కవితాంజలి: సందే(హం)శం

January 09, 2013 -

సందే(హం)శం

గతించిన కాలపు గొంగడిని కప్పుకుని

నిషిద్ధ అంతరంగపు దారులలో సంచరిస్తూ

ఉన్న నా వెనుక ఈ పాదముద్రలెవరివి?

రవ్వంత సడి లేని నా ప్రపంచంలో వినబడుతున్న

ఆ కోటి సంభాషణల సారమేమిటి?

చెలియలకట్ట మీద నిలబడి

ప్రళయాన్ని ఆహ్వానిస్తున్న నన్ను

చేయి పట్టుకుని వెనకకు లాగిందెవరు?

వెనుదిరిగి చూసాను..

ఎవరూ లేరు!!

నేను ఎప్పుడో వదిలేసిన పావురాయి

నా వైపు యెగిరి వస్తూ కనిపించింది

చివరి చిరునామాలో ఉంటానని దానికేలా తెలిసిందో!!

అస్పష్టమైన సందేశమేదో మోసుకును వచ్చిందది

భాషే రాని నాకు భావమెలా అర్ధమవుతుంది?

అయినా మనసుకి, భావాలకి మధ్యన వంతెన

ఎప్పుడో చెదపురుగుల పాలయ్యిందిగా

సలహా చెప్పేందుకు, సందేహం తీర్చేందుకు

నా నీడైనా నా వెంట లేదే

ఏ ముళ్ళపొదకు చిక్కుకుని చిరిగిపోయిందో మరి

ఇంకెలా సమాధానమివ్వను? అసలీ సందేశాన్నేమనుకోను?

పావురాయిని చేతిలోకి తీసుకుని కూర్చుండిపోయాను

నానుండి నేనే తప్పిపోయాననిపిస్తుండగా!!