కవితాంజలి: గుండెలో పొద్దుగుంకింది

February 24, 2013 -

గుండెలో పొద్దుగుంకింది

గుండెలో నిన్ననగా పొద్దుగుంకింది

ఇంతవరకూ వెలుతురే రాలేదు

సూరీడు కోసం ఎదురుచూపు

ఎదురుచూపుగానే మిగిలిపోయింది

చూరుకు వేళ్ళాడుతున్న లాంతరులాగ

మిణుకుమిణుకుమంటూ కునుకు

కళ్ళను పట్టుకుని ఊగుతోంది

గుబులు తాలూకు నీడలు

గుండె నిండా పరుచుకుని భయపెడుతున్నాయి

ఏదేదో గొణుగుతున్న బాధ

కీచురాళ్ళ శబ్దంలాగా వినబడుతోంది

ఉండచుట్టిన కన్నీటి మూట ఉట్టిపైనే ఉంది

బొట్టుబొట్టుగా జారి గుండె నేలను తడుపుతున్నాయి కన్నీళ్లు

ఆవిరి..భరించలేని ఆవిరి లేచి

గుండె భగ్గున మండుతోంది

సూరీడి జాడింకా లేదు

కునుకు పోనూ పోదు, రానూ రాదు

సూరీడిక రాడని రూఢీగా తెలుపుతూ

ఈ చీకటి రాత్రికి మరింత నలుపును పూస్తూ

ఇంకొక పొద్దు వచ్చి వాలింది!!